Rúm 80% þeirra sem koma á Vog er reykingafólk

Viðtal MT við Valgerði Rúnarsdóttir lækni á Vogi

Fólk í bata hvatt til að hætta að reykja

Hér á árum áður var fólk í meðferð hvatt til að hætta ekki að reykja. Það myndi valda því of miklu álagi. Í dag hefur mikil breyting orðið þar á og jafnvel talað um að reykingarnar sjálfar séu nátengdar alkóhólisma og fíkn.Fólk í meðferð er því hvatt til að hætta að reykja. „Við hvetjum fólk í meðferð til að hætta að reykja,“ segir Valgerður Rúnarsdóttir, læknir á Vogi, og sumir hætta strax því SÁÁ hefur aukið mjög á fræðslu um reykingar og nikótínfíkn í meðferðinni.

Aðeins átta af hverjum hundrað sem sækja meðferð á Vog hafa aldrei reykt. Yfir átta af hverjum tíu í meðferð er reykingafólk. En samkvæmt Valgerði er mjög áhrifaríkt að nota bataprógrammið til að hætta að reykja. „Og ég vil sérstaklega hvetja fólk sem er heima og í bata að hætta að reykja,“ segir Valgerður og er mikið niðri fyrir. „Of stór hluti okkar fólks reykir. Það er að deyja úr reykingum og það sem meira er, síðustu 20 ár af ævi reykingamanns eru erfiðari en annarra. Reykingamanneskjan er veikari.“

Það má færa sterk rök fyrir því að það séu meiri líkur en minni að Íslendingur sem reykir sé einnig alkóhólisti. Sjö af hverjum hundrað Íslendingum hafa þegar farið á Vog. Sautján af hverjum hundrað Íslendingum reykja. Gera má ráð fyrir að jafnstór hópur og hefur farið á Vog hafi ekki farið og sé enn að glíma við Bakkus. Sem merkir ein-faldlega að ef þú ert háð eða háður nikótíni eru meiri líkur á því að þú sért einnig að berjast við aðra fíkn.

„Nikótínfíkn er alvöru fíkn,“ segir Valgerður og hefur áhyggjur af því að þeir sem reyki ennþá eftir meðferð þurfi einfaldlega meiri meðferð. „Það hangir mjög vel saman að vera virkur fíkill eða alkóhólisti og vera reykingamanneskja.“

MT er Mikael Torfason

Sjá einnig SÁÁ blaðið á pdf formi