Eldra fólkið sem kemst ekki á Vog fer ekkert á göngudeildir

Á síðasta ári voru 2208 innlagnir á Vog og í 525 skipti áttu í hlut einstaklingar sem voru 50 ára og eldri. Það er sammerkt með þessum einstaklingum ef þeir eru ekki að koma af sjúkrahúsum, að þeir hafa drukkið daglega eða notað ávanalyf daglega í langan tíma nema hvort tveggja sé. Þeir geta ekki stoppað neysluna og komast því ekki í meðferðirnar sem boðið er upp á í göngudeildum.

Það sem meira er og mestu máli skiptir er að flestir þessara einstaklinga eru á lyfjum sem þeir þurfa að taka daglega. Í þessum hópi sjúklinga eru hjartasjúkdómar, háþrýstingur, lungnasjúkdómar og sykursýki mjög algengir.

Dagdrykkjan gerir alla þessa sjúkdóma verri og spillir lyfjameðferð þessa fólks svo auðvelt er að sjá í hvert stefnir ef þessum sjúklingum verður ekki sinnt á svipaða hátt á komandi ári og áður. Margir þeirra munu lenda á bráðamóttökum sjúkrahúsanna, leggjast þar inn og skapa þar margfalt meiri kostnað en sparast við það að fækka innlögnum þeirra á Vog.

Talið er að kostnaður þjóðfélagsins vegna áfengis og vímuefnasjúklinga sem koma á hin almennu sjúkrahús sé tvöfalt meiri en áfengis- og vímuefnameðferðir kostar. Einn dagur á öðru sjúkrahúsi kostar líklega 5-6 sinnum meira en einn dagur á Sjúkrahúsinu Vogi. Nýlega reiknuðu Bretar að áfengis- og vímuefnasjúklingur, ómeðhöndlaður, kostaði þjóðfélagið 3 milljónir á ári.

Sjúklingar sem eru 50 ára og eldri og komast ekki á Vog fara ekkert á göngudeildir. Þeir fara heim til sín eða á bráðamóttökur sjúkrahúsanna. Þetta er öllum ljóst sem eitthvað þekkja til málanna.

Þegar menn segja að fækka megi innlögnum á Vog og meðhöndla sjúklingana á göngudeildum vaða þeir í villu.

Þórarinn Tyrfingsson