Bjargvættur í íslensku þjóðfélagi
Vigdís Finnbogadóttir, fyrrverandi forseti, óskar þess að starfsemi SÁÁ dragist ekki saman um of á þeim þrengingar tímum sem nú ganga yfir.
Engum getur blandast hugur um að SÁÁ – Samtök áhugafólks um áfengis- og vímuefnavandann – hefur verið mikill bjargvættur í íslensku þjóðfélagi í rúma þrjá áratugi. Þessi vönduðu og einörðu samtök hafa á meðferðarstofnunum sínum og með sjálfboðavinnu einstaklinga hvergi látið deigan síga við að leiðbeina sjúku fólki til sjálfshjálpar, fólki sem er fjötrað í hlekkjafesti vímuefna. Starfsfólk SÁÁ og sjálfboðaliðar AA-hreyfingarinnar eru stöðugt að, reiðubúnir allar stundir að veita nauðsynlega aðstoð, og fundir eru skipulagðir víðsvegar um allt land hvern einasta dag allan ársins hring.
Þrengingatímar ganga um þessar mundir yfir Íslendinga og bitna illa á þeim, sem minnst mega sín og eiga í veikindum af ýmsum toga. Það er því í mörg horn að líta hjá stjórnvöldum og hjálparstofnunum, sem hafa það hlutverk með höndum að veita sjúkum læknishjálp og styrkja þá til sjálfshjálpar, sem eiga slíkar batahorfur.
Í andstreymi er viðbúið að sumum verði á að flýja á „náðir“ áfengis eða annarra vímugjafa, þannig að SÁÁ og aðrar meðferðarstofnanir verða ef til vill að reiða sig enn meira en áður á AA-hreyfinguna og hinn ómælda stuðning þess mikla fjölda kvenna og karla, sem hafa náð þeim sigri að halda sig frá áfengi og öðrum vímuefnum. SÁÁ kynni því í meira mæli en áður að þurfa að fá virka AA-félaga til að leiða þá sem útskrifast inn í AA-hreyfinguna og fylgjast með þeim nýliðum uns þeir hafa fundið sér samastað þar. Ríkari áhersla á þetta skipulag ætti að fækka endurkomum inn á meðferðarstofnanir og þannig nýttust rýmin þar betur en til þessa.
Það er gott til þess að vita að önnur eins öndvegishreyfing og SÁÁ skulu vera stöðugt að verki á Íslandi og að hún eigi sér voldugt bakland í AA- samtökunum, sem hefur tekið við áfengis- og vímuefnasjúku fólki á batavegi frá meðferðarstöðum í meira en hálfa öld.
Það er einlæg ósk okkar allra, að starfsemi SÁÁ þurfi ekki að draga saman seglin um of á meðan íslensk þjóð er að vinna sig út úr erfiðleikum.
Megi framtíðarheill fylgja öllu því góða fólki sem tengist SÁÁ og AA.
Vigdís Finnbogadóttir