Sýnum stuðning okkar í verki

„SÁÁ hefur verið tugþúsundum Íslendinga öflug björgunarsveit.“

Sum samtök verða svo áhrifarík að þau breyta sýn heillar þjóðar, ná með verkum sínum að skapa nýja von, leggja grunn að betra lífi.

SÁÁ hefur verið tugþúsundum Íslendinga öflug björgunarsveit, leitt einstaklinga á farsælar brautir, forðað þeim frá örvæntingu og margvíslegum þjáningum, en líka kveikt gleði í hjörtum ættingja og vina, barna, maka, foreldra, fjölskyldna þeirra sem leituðu sér lækninga.

Á vettvangi samhjálparinnar er SÁÁ í senn brautryðjandi og bakhjarl, samfélag lækna, sérfræðinga og starfsfólks sem ætíð er reiðubúið að koma til bjargar.

Nú ríður á að við sýnum líka stuðning okkar í verki.

Ólafur Ragnar Grímsson