Hin heimska hönd hagræðingarinnar

Grímur Atlason, sveitastjóri Dalabyggðar skrifar: 

Jólin 1978 voru öðruvísi en hjá fjölmörgum fjölskyldum á Íslandi. Freeportferðir undangenginna missera og stofnun SÁÁ skömmu áður höfðu sagt upplausninni, niðurlægingunni og sundruðu fjölskyldunum stríð á hendur. Bakkus hafði loksins fengið verðugan andstæðing á Íslandi. Nú eru yfir 30 ár liðin og þúsundir einstaklinga og fjölskyldna hafa öðlast nýtt líf m.a. fyrir tilstuðlan starfsemi SÁÁ. Persónulega á ég SÁÁ margt að þakka og mér hlýnar um hjartaræturnar þegar ég horfi yfir Hvammsfjörðinn á gamla húsmæðraskólann á Staðarfelli.

Hörmungar alkóhólismans kosta þjóðarbúið milljarða árlega – þá er ekki settur verðmiði á það andlega tjón sem sjúkdómurinn veldur. Það er gríðarlega mikilvægt að starfsemi SÁÁ haldi áfram af sama krafti og fyrr. Hin heimska hönd hagræðingarinnar má ekki taka yfir þó það séu vissulega erfiðir tímar. Það hefur líklega aldrei verið mikilvægara en einmitt nú að veita öfluga heilbrigðisþjónustu fyrir alkóhólista og aðstandendur þeirra. Starfsemi SÁÁ er á heimsmælikvarða – við megum ekki glata henni. 

Sjá SÁÁ blaðið 3.tbl 2009