Hvert fara fjármunirnir?

Pétur T. Gunnarsson: „SÁÁ og Vogur hafa hjálpað hundruðum (ef ekki þúsundum) einstaklinga úr viðjum áfengis og annarra vímuefna.“

Hvað fékk Eimskip marga milljarða afskrifaða? Hvað fékk Toyota marga milljarða afskrifaða? Hvað fékk Vífilfell marga milljarða afskrifaða? Þarf ekki að skera niður í dómskerfinu? Þurfa ráðamenn ekki að borga fyrir fiskveiði í Elliðaánum? Hvert fóru arðgreiðslur fyrirtækja, fjármálastofnana og eignarhaldsfélaga undanfarin ár? Mér hryllir við að heyra slíkar spurningar.

Hvað er það sem ég heyri svo í kjölfarið, að það þurfi að skera niður hjá SÁÁ og Vogi? Það getur varla verið að það muni svo miklu um slíka smáaura miðað við ofangreint. Það þarf ekki einu sinni að ræða slíkan möguleika. Hann er gjörsamlega fráleitur. Kostnaður samfélagsins sem fylgir slíku er margfalt meiri en ávinningur niðurskurðarins.

SÁÁ og Vogur hafa hjálpað hundruðum (ef ekki þúsundum) einstaklinga úr viðjum áfengis og annarra vímuefna. Það fólk hefur þannig fengið aftur tækifæri á að taka virkan þátt í samfélaginu, aflað sér menntunar, eflt atvinnumarkaðinn og skilað tilbaka gríðarlegum tekjum í kassa ríkis og sveitarfélaga í formi skatta og ýmissa gjalda.

Virkur einstaklingur í samfélaginu getur auðveldlega skilað um 100-125 þúsundum tilbaka í samfélagið í hverjum mánuði í formi launaskatts og virðisaukaskatts af neysluvörum. Þá eru ótaldar vaxtatekjur vegna lána, fasteignagjöld og svo framvegis. Þetta gerir 1200-1500 þúsund árlega á hvern einstakling. 300 einstaklingar skila þannig auðveldlega 450 milljónum árlega til ríkis og sveitarfélaga.

Þarf eitthvað að ræða þetta? Nei, ég hélt ekki.

Sjá SÁÁ blaðið 3. tbl 2009