Nú er vá fyrir dyrum

Ef ég yrði fyrir því að detta og brjóta nokkur bein fengi ég meðhöndlun færustu lækna og sérfræðinga og að því búnu yrði mér trillað í endurhæfingu, mér nánast að kostnaðarlausu. Allt hluti af lögboðinni heilbrigðisþjónustu. SÁÁ, Samtök áhugafólks um áfengis- og vímuefnavandann, hafa frá stofnun haft á að skipa færustu sérfræðingum í meðhöndlun áfengis- og vímuefnasjúklinga og aðstandanda þeirra. Með þrautseigju og faglegan metnað að leiðarljósi hefur SÁÁ lyft grettistaki í meðferð þess stóra þjóðfélagshóps sem ánetjast hefur áfengi og öðrum vímuefnum. Oftar en ekki hafa samtökin þurft að glíma við fjársvelti, stundum svo alvarlegt að þurft hefur að loka eftirmeðferðastofnunum tímabundið. SÁÁ er ekki ríkisstofnun en hefur notið fjárframlaga frá ríkinu og í gildi er þjónustusamningur við sjúkrasamlag ríkisins.

Nú er vá fyrir dyrum. Uppi eru áætlanir um að skera fjárframlög ríkisins til SÁÁ niður um 70-100 milljónir. Afleiðingar slíks niðurskurðar verða grafalvarlegar fyrir samfélagið allt.

Ég skora á stjórnvöld að að standa vörð um starfsemi SÁÁ og kvika í engu frá stuðningi sínum við samtökin.

SÁÁ bjargar mannslífum.

Pálmi Gunnarsson tónlistarmaður