Hvað skiptir mestu máli í lífi okkar?

Ég vinn við að selja fasteignir og hef gert síðastliðin 5 ár, starfið er gríðarlega skemmtilegt vegna þess að það fylgir því alltaf mikil gleði að flytja í nýtt húsnæði. Á síðustu misserum hefur starfið breyst að því leyti að fólk er ekki eingöngu að selja í gleði heldur líka í sorg, fólk í fjárhagsvandræðum þarf að komast út úr skuldum og svo framvegis.

Margar myndir kreppunnar koma fram í fasteignageiranum og margir eru í vandræðum en alls ekki allir. Íslendingar spá mikið í hvað þeir eiga í fasteignum sínum þó svo að þeir séu ekkert að fara að selja, fasteignaverð hefur farið upp og niður síðustu 30 ár og kemur til með að gera það næstu 30 árin. 

En hvað skiptir mestu máli? Viðskiptavinur hjá mér skuldar 60 milljónir í 30 milljón króna eign og var að meta það með sjálfri sér hvað skipti hana máli í lífinu. Hún spurði sjálfa sig hvort hún væri til í að losna við allar sínar skuldir í skiptum fyrir að dóttir hennar myndi missa framan af einum fingri? Svarið var einfalt: Hún myndi aldrei skipta út skuldum sínum fyrir svo lítið sem grátur hjá dóttur sinni.

Ég viðurkenni að þetta er furðulegur samanburður en þegar maður metur stöðuna og pælir í því hvað skiptir máli þá verða peningamál smámál í samanburði við velferð barna okkar og fjölskyldna.

Pælum í því hvað skiptir okkur raunverulega máli. Við megum ekki skemma þá ótrúlegu uppbyggingu sem SÁÁ hefur staðið fyrir síðustu þrjátíu ár af því að við eigum tímabundið í fjárhagsvandræðum. SÁÁ og Vogur er fyrir fjölskyldurnar í landinu. Verjum það sem skiptir máli.

Hannes Steindórsson fasteignasali