– heil helgi í sjálfskoðun og stöðumati.

Batanámskeiðin hafa notið mikilla vinsælda hjá alkóhólistum og fíklum í bata, enda eru þau sett þannig upp að litlu skiptir hvort einstaklingurinn hefur verið edrú í 3 mánuði eða 300 eitthvað á námskeiðinu mun höfða til hans og koma honum að gagni. Námskeiðin hafa verið mjög fjölbreytt og skemmtileg í gegnum tíðina enda fátt skemmtilegra en að skoða sjálfan sig og draga fram góðan árangur í lífinu og fátt sem gefur manni meira en að skoða þau atriði sem betur mega fara og kryfja hvernig breyta má til batnaðar.

Batanámskeiðið er sett saman með fyrirlestrum og hópfundum þar sem fléttað er saman umræðu um fíknisjúkdóma og bata, þróun batans, hvernig bati getur orðið ófullkominn og þróast í fall og svo framvegis. Einnig er ýtarleg umræða um sjálfsvirðingu og sjálfsskoðun og að mjög líklega verður rætt um reynsluspor AA og hvernig gengur að nýta sér AA samtökin og önnur sambærileg samtök í batanum. Allir þátttakendur fá möppu með námskeiðsgögnum í upphafi námskeiðsins.

Í lok námskeiðsins verður sameiginlegur lokafundur með öllum þátttakendum námskeiðsins þar sem námskeiðið er gert upp og hægt að glöggva sig á ávinningnum.

Markmiðin með námskeiðinu er að auka skilning þátttakenda á bata við fíknisjúkdómum og hjálpa þeim að glöggva sig á hvar þeir eru staddir í bataþróuninni. Í kjölfarið ættu þeir sem taka þátt í námskeiðinu að skilja betur hvaða verkefnum þeir standa frammi fyrir og vera hæfari til að setja sér markmið.

Að framansögðu má sjá að efni Batanámskeiðsins höfðar til mjög margra. Þeir sem hafa lokið almennri meðferð eða Víkingameðferð á Staðarfelli, kvennameðferð eða Heldrimannameðferð á Vík eða Meðferðarhóp í VON á undanförnum mánuðum hafa margir sett sér það markmið að koma á Batanámskeið, enda er námskeiðið sniðið fyrir þau, en Batanámskeiðið höfðar ekki síður til þeirra sem eiga lengri edrútíma að baki eða hafa jafnvel aldrei farið í formlega meðferð. Eina skilyrðið fyrir þátttöku er að hafa verið allsgáður og virkur í AA samtökunum í að minnsta kosti þrjá mánuði.

Bati & ófullkominn bati - fræðsluhelgi fyrir alkóhólista/fíkla

Batahelgin fer fram laugardag og sunnudag kl. 09:00 - 16:00.

Skilyrði þátttöku í batahelginni er að þátttakendur hafi verið allsgáðir og virkir í AA-samtökunum í minnst þrjá mánuði. Ekkert mælir gegn því að hjón (fólk í sambúð) komi saman á batahelgina, enda verði þau ekki saman í hóp.

Markmið batahelgarinnar er að auka skilning þátttakenda á bata við alkóhólisma og hjálpa þeim til að glöggva sig á hvar þeir eru staddir í þróun batans. Í kjölfar helgarinnar ættu þátttakendur að skilja betur en áður, hvaða verkefnum þeir standa frammi fyrir, vera hæfari til að setja sér markmið og framfylgja þeim.

Fyrirlestrar og hópfundir

Batahelgin fer fram með fyrirlestrum og hópfundum. Haldnir eru fimm fyrirlestrar:

• Alkóhólismi og bati við honum

• Bataþróun

• Bati og ófullkominn bati

• Föll og fallþróun

• Sjálfsskoðun

Þátttakendur fá minnisblöð í fyrirlestrartímum svo þeir geti fylgst betur með og rifjað upp efni fyrirlestrana síðar. Hópfundir verða 6 og einn sameiginlegur fundur með öllum þátttakendum er í lokin. Á hverjum hópfundi er sérstakt umræðuefni tengt fyrirlestrunum, sem ráðgjafi kynnir í upphafi fundar.

Batahelgar eru reglulega á dagskrá í VON Göngudeild SÁÁ í Reykjavík og einnig í Göngudeild SÁÁ á Akureyri.

Skráning og upplýsingar eru í síma 530-7600.