Opna eftir sumarfrí

Göngudeildir SÁÁ í Reykjavík og á Akureyri opna aftur eftir sumarfrí þriðjudaginn 3 ágúst. Deildirnar hafa verið lokaðar frá 28 júní sl. Símanúmer SÁÁ er 530 7600.

SÁÁ starfrækir Sjúkrahúsið Vog í Reykjavík sem var tekið í notkun árið 1984 og hefur fjöldi sjúklinga að undanförnu verið um 2000 á ári. Öll meðferð samtakanna hefst á Vogi. Gerðar eru læknisfræðilegar greiningar á öllum sjúklingum og þar með geðgreiningar. Aðkeyptar eru allar nauðsynlegar læknisrannsóknir og þau sérfræðiálit sem þörf er á bæði hvað varðar líkamlega heilsu og geðræn vandamál. Gerðar eru skimunarrannsóknir vegna kynsjúkdóma, alnæmis og lifrarbólgna og unglingar eru bólusettir við lifrarbólgu B. Allt þetta starf er unnið í náinni samvinnu við Húð- og kynsjúkdómadeild Landspítalans, Smitsjúkdómavarnir Landlæknisembættisins og Lyflækningadeildir Landspítala og Sjúkrahús Reykjavíkur. Auk þessa er góð samvinna við Geðdeild Landspítalans.

Auk Sjúkrahússins Vogs rekur SÁÁ umfangsmikla starfsemi í Reykjavík. Göngudeild samtakanna er í Efstaleiti 7, en þar er eftirmeðferð fyrir sjúklinga og fræðslu- og upplýsingamiðlun.

Á Akureyri starfrækir SÁÁ göngudeild og upplýsingaþjónustu fyrir áfengis- og vímuefnasjúklinga og aðstandendur þeirra.