John Grant á KKRR

John Grant

John Grant á Kaffi, kökum & rokki & róli

Tónleikaröðin Kaffi, kökur & rokk & ról fer aftur í gang þriðjudaginn 17. janúar næstkomandi í Edrúhöllinni, Efstaleiti 7. Það er hinn virti bandaríski tónlistarmaður John Grant sem mun opna röðina.

John Grant hefur verið í miklu dálæti hjá tónlistarunnendum síðustu misseri en hann vakti mikla athygli með fyrstu sólóplötu sinni, The Queen of Denmark (2010). Var hún valin plata ársins af hinni mikilsvirtu tónlistarbiblíu Mojo það ár. Grant spilaði þá á Airwaves og fékk mikið lof fyrir. Tók hann ástfóstri við land og þjóð og mun hann dvelja hér þennan mánuð og vinna að tónlist sinni.

Forsvarsmenn tónleikaraðarinnar hafa verið í góðu sambandi við Grant síðan hann kom hingað til lands í október og að sögn þeirra tók hann einkar ljúfmannlega í þá hugmynd að opna röðina. Hún verður með svipuðu fyrirkomulagi og verið hefur og verða tónleikar á hálfsmánaðarfresti.