Flutningar í dag

Langþráður flutninsdagur er runninn upp. Skrifstofa og göngudeild SÁÁ flytja frá Síðumúla 3-5 í Efstaleit 7 í dag. Húsið er ekki alveg fullbúið ennþá en flutningum verður ekki frestað lengur en gert var ráð fyrir að húsið yrði afhent 25. september sl..

Þeir sem þegar hafa flutt sig í nýja húsið segja að þar sé góður andi og gott að vera. Veðrið er líka bjart og létt er yfir fólkinu. Auk skrifstofu og göngudeildar verður forvarnadeild SÁÁ í Efstaleiti auk þess sem hluti af rannsóknarstarfi vegna vegna samstarfs SÁÁ og Íslenskrar erfðagreiningar flyst í Efstaleitið.

Við  flutninginn mun einnig verða kleift að stórauka hið mikla göngudeildarstarf sem unnið er á vegum SÁÁ. Þetta starf hefur fyrir löngu sprengt utan af sér eldra húsnæði í Síðumúla en starfsemin á göngudeildinni var m.a.:

• 8-9000 viðtöl á ári 
• 450 fyrirlestrar á ári: (sjúkdómurinn og afleiðingar, ýmis meðferðarúrræði og stuðningur við aðstandendur) 
• Fjölskyldumeðferð (fyrir aðstandendur): 20 manns tvisvar í viku
• Eftirfylgni við þá sem lokið hafa meðferð: 35 manns einu sinni í viku
• Unglingahópur: 10-20 einstaklingar vikulega
• Foreldrahópur fyrir foreldra barna í meðferð: 20 manns vikulega
• Eftirfylgni við kvennameðferð: 40 konur 1-2 í viku
• Endurkomukarlar: 40 karlar 1-2 í viku
• Meðferðarhópur fyrir fíkla: 12 manns á dag allt árið 
• Batanámskeið fyrir fíkla: 12-15 manns í hverjum mánuði eina helgi
• Stuðningshópur fyrir fíkla: 10 manns á dag allt árið

Þessi mikla starfsemi er ekki öllum kunn og oft tala ýmsir ráðamenn eins og starf SÁÁ felist fyrst og fremst í inniliggjandi meðferð. Inniliggjandi meðferð er hins vegar hryggjarstykki starfseminnar og án hennar væri göngudeildarstarfið ekki svipur hjá sjón.