Aukin samvinna SÁÁ og lögreglunnar

Með samkomulagi milli embættis lögreglunnar á höfuðborgarsvæðinu og SÁÁ komst á aukin samvinna milli aðila. Þessi samvinna birtist m.a. í því að lögreglan hefur greiðan aðgang fyrir einstaklinga með bráðan áfengis- og vímuefnavanda inn í meðferð og afeitrun. Samkomulagið gefur einnig tækifæri til að nýta lagaheimildir um meðferð fyrir einstaklinga háða áfengi og vímuefnum sem eru að taka út skilorðsbundna dóma. Þessa heimild hefur ekki verið hægt að nýta fyrr en nú því engin skylda hefur hvílt á sjúkrastofnunum til að taka einstaklinga til meðferðar undir þessum kringumstæðum.  Í þriðja lagi gerir samkomulagið ráð fyrir samvinnu milli aðila í fræðslu- og forvarnamálum, bæði gagnvart lögreglunni og almenningi.

Það er skemmst frá því að segja að þetta samkomulag hefur nýst báðum mjög vel og vakið almenna ánægju.

Það var t.d. þéttsetinn bekkurinn á fræðslufundi yfirlæknis SÁÁ um skaðsemi amfetamíns sem fram fór í lögreglustöðinni við Hverfisgötu í gær. Á fundinum fór Þórarinn yfir sögu amfetamíns og þróun neyslu þess í hinum vestræna heimi, hverjar eru lífeðlisfræðilegar afleiðingar af ofneyslu og hvernig fíknin birtist meðal þeirra sem sem leita sér lækninga við henni.

Á meðfylgjandi mynd má sjá Karl Steinar Valsson aðstoðaryfirlögregluþjón og Þórarinn Tyrfingsson yfirlækni kampakáta í lok fræslunnar að strengja heit um áframhaldið.