Styrkur Aflsins

Aflinn – félag iðkenda qi gong (tsjí gong) á Íslandi hefur undanfarið ár stundað hinar árþúsunda gömlu, kínversku lífsorkuæfingar undir leiðsögn Gunnars Eyjólfssonar leikara í Von.

Gunnar Eyjólfsson lýsir qi gong á þennan hátt:

• Qi gong er aðferð mannsins til öflunar, varðveislu og dreifingar orku um líkama sinn.
• Qi er lífskraftur, hreyfiafl alheimsins. Maðurinn er kjarni, orka og  vitund  Vitundin stjórnar orkunni og orkan glæðir kjarnann.
• Á íslensku er qi gong  best lýst með orðinu ræktun. Iðkun qi gong á uppruna sinn austur í Kína og hefur þróast þar í aldanna rás.
• Qi gong er þríþætt:  hugleiðslu qi gong, bardaga- eða baráttu qi gong og heilsu qi gong. Undirstaðan er agaður líkamsburður – öguð öndun og  öguð hugsun eða einbeitni.
• Qi er afl. Qi gong er viðleitni einstaklinga til eigin orkuvæðingar. Iðkandinn gengur til móts við lífsorkuna, gengur henni skilyrðislaust á hönd og öðlast þegnrétt í ríki hennar.

Það hefur verið sérstaklega ánægjulegt að hafa þetta andans fólk í Von og 25. apríl færði það Unglingadeild SÁÁ rausnarlegan styrk að upphæð kr. 250.000. SÁÁ þakkar styrkinn og vonar að lífskrafturinn muni ekki dvína og hreyfiafl alheimsins verða þróttmikið lengi enn.