Fréttabréf Húsvina SÁÁ

Nú er um eitt ár liðið frá því hópur velunnara SÁÁ kom fyrst saman og myndaði hóp sem kallast í dag Húsvinir SÁÁ. Á þessu eina ári hafa Húsvinir komið að ýmsum verkefnum fyrir SÁÁ.

Á Vogi hefur verið unnið að margskonar viðhaldsverkefnum. Loftræsti og hitakerfið hefur verið endurnýjað og er nú jafn og góður hiti í húsinu og loftræsting mjög góð. Gólf hússins voru bónuð. Utanhúss hefur verið unnið markvist að ákveðnum fyrirbyggjandi verkefnum. Þakkanturinn hreinsaður og málaður, borið á alla harðviðar glugga og hurðar á nýrri hluta hússins. Allt þetta hefur verið unnið í sjálfboðavinnu.

Á Staðarfelli hefur talsvert verið framkvæmt. Má þar nefna að allt skólahúsið hefur verið málað að innan, gluggar málaðir, hurðar og skápar í herbergjum teknir í gegn og lakkaðir, gólfdúkur lagður á neðsta ganginn og fleira framkvæmt sem telst til eðlilegs viðhalds.

Smíðaður var nýr stigi niður í neðri búðir, sem svo eru kallaðar þar sem starfsmenn á Staðarfelli búa. Gert var við ýmsar steypuskemmdir á húsunum í neðri byggð og þau máluð að utan. Allt þetta hefur verið unnið í sjálfboðavinnu.

Einnig var ráðist í miklar framkvæmdir við endurnýjun lagna bæði fyrir hitalögn og neysluvatn í íbúðir staðarhaldara og matreiðslumanns. Einnig var gerð mikil bragarbót á varaaflstöðinni og aðstæðum í húsnæði hennar.

Húsvinir SÁÁ telja í dag um 30 félaga, sem allir eiga það sammerkt að vilja þakka SÁÁ fyrir sig með einhverjum hætti.

Lesa meira í fréttabréfi Húsvina SÁÁ