SÁÁ og bandaríska heilbrigðisráðuneytið rannsaka lyf sem á að koma í veg fyrir föll hjá amfetamínfíklum eftir meðferð

Lyfið sem rannsaka á heitir naltrexone. Það hefur verið notað í nokkur ár við áfengissýki með nokkrum árangri. Sænskir vísindamen gerðu nýlega (2008) rannsókn sem gefur vonir um að lyfið geti komið í veg fyrir föll hjá amfetamínfíklum.

Nú á næstunni mun SÁÁ ásamt nokkrum samstarfsaðilum hefja viðamikla og dýra lyfjarannsókn. Undirbúningur verksins er á lokastigi. Það er undirstofnun bandaríska heilbrigðisráðuneytisins, NIDA, sem kostar rannsóknina að mestu en nokkur kostnaður mun falla á SÁÁ. Ekki hefur tekist að fá innlenda aðila til að styrkja rannsóknina enn sem komið er.

Lyfið sem rannsaka á er dýrt og rannsóknin er einungis möguleg vegna þess að lyfjafyrirtækið Alkermes lætur lyf og lyfleysur af hendi endurgjaldslaust.  Að öðru leyti kemur ekki fjárstyrkur frá því fyrirtæki. 

Samstarfsaðili  SÁÁ í rannsókninni er Pennsylvania Háskólinn í Bandaríkjunum (The University of Pennsylvania)

Lyfjarannsóknin er tvíblind sem kallað er og verður sjúklingum gefin forðasprauta (VIVITROL) einu sinni í mánuði í hálft ár. Sjúklingar fá að öðru leyti venjulega meðferð við sinni fíkn og sækja göngudeildarstuðning að stofnanameðferðinni lokinni.