Heiðursmenn halda fund

Gestur Heiðursmanna að þessu sinni er Sóley Tómasdóttir, borgarfulltrúi í Reykjavík.

Hún var varaborgarfulltrúi frá kosningum vorið 2006 og en tók sæti borgarfulltrúa þegar Svandís Svavarsdóttir var kjörin á þing vorið 2009. Sóley hefur lengi verið virk í Vinstrihreyfingunni - grænu framboði og hefur verið ritari flokksins frá árinu 2007.

Sóley hefur setið í umhverfisráði, mannréttindaráði, menningar- og ferðamálaráði, leikskólaráði og framkvæmda- og eignaráði. Hún situr nú í íþrótta- og tómstundaráði og skipulagsráði Reykjavíkurborgar. Jafnframt situr Sóley í stjórn Faxaflóahafna og er formaður borgarstjórnarflokks Vinstri grænna.

Sóley ólst upp að mestu leyti í Kópavogi en fluttist til Reykjavíkur á unglingsárum. Hún er stúdent frá MH og er með BA-gráðu í uppeldis- og menntunarfræðum. Hún hefur unnið hjá Félagsvísindastofnun HÍ, á auglýsingastofunni Hvíta húsinu, Auglýsingastofu skaparans og hjá íþrótta- og tómstundasviði Reykjavíkurborgar. Frá hausti 2007 hefur hún verið í fullu starfi fyrir borgarstjórn Reykjavíkur og Vinstri græn.

Fundurinn 11. mars verður hefðbundinn og hefst venju samkvæmt kl 12.00 á sjúkrahúsinu Vogi.

Heiðursmenn hafa sannað sig sem öflugur bakhjarl SÁÁ og mikilvægt er að starfið sé lifandi og kröftugt. Skorað er á heiðursmenn SÁÁ að mæta og taka með sér gesti.