SÁÁ

Könnun

Á SÁÁ að þróa sérstaka meðferð fyrir einstaka hópa eða ætti sama meðferðin að duga fyrir alla?

Candy

Áströlsk 2006

Leikstjóri: Neil Armfield

Leikarar: Heath Ledger, Abbie Cornish, Geoffrey Rush o.fl.

24. október

Sýnd kl. 21:00

 

Candy er gerð eftir bók ástralska höfundarins og skáldsins Luke Davies, sem ánetjaðist heróíni en náði síðar að verða edrú. Sagan er byggð á kafla úr lífi Luke; sambandi hans við stúlkuna Candy, foreldra hennar og gamlan og sjóaðan heróínsjúkling. Í grunninn er þetta ástarsaga en sem fíknin strokar út. Luke Davies hefur haldið sig frá vímugjöfum í mörg ár og skrifað nokkrar bækur sem hafa selst vel og fengið góða dóma. Áhorfendur geta því huggað sig við að sagan endar vel — eftir að myndinni líkur.

 

Það er Heath Ledger sem leikur Dan, persónuna sem er byggð á höfundinum. Og eins og oftast er frammistaða hans frammúrskarandi. Hið sama má reyndar segja um hina kornungu Abbie Cornish, sem leikur stúlkuna Candy. Geoffrey Rush er hins vegar sjálfum sér líkur í hlutverki Casper, gamalls fíkils.

 

Sem kunnugt er dó Heath Ledger af of stórum skammti af lyfjakokteil tæplega þrítugur að aldri. Flest voru þessi lyf kvíðastillandi eða til að stemma stigum við þunglyndi eða verkjum — ekki vímuefni af götunni heldur úr apótekinu. Á stuttum ferli sýndi Heath Ledger að hann var einstakur hæfileikamaður. Frammistaða hans í þessari litlu áströlsku myndi er glæsileg. Það er hæpið að einhver hafi farið betur með hlutverk heróínsjúklingsins.

 

Fyrir áhugamenn um bókmenntir; þá segist höfundurinn Luke Davies hafa fengið löngun til að verða edrú við lestur bókarinnar Arctic Dreams eftir kanadíska skáldið og höfundinn Barry Lopez. Þessi bók er byggð á fimmtán ferðum Lopez til ísauðnanna í nyrstu hlutum Kanada og þykir meðal bestu bóka sem lýsa fegurð, hreinleika og ógn norðursins — norðurs sem gerir Ísland að hitabeltislandi. Ljóðrænn texti Lopez af ísnum í norðri kveikti lífslöngun í brjósti Luke Davies í hitanum í Ástralíu, svo til alveg hinum meginn á hnettinum. Heath Ledger les kafla úr Arctic Dreams fyrir elskuna sína í myndinni.

 

Til baka

 

 

  

 Reynslusögur á RÚV !

Umfjöllun morgunútvarps Rásar 2 um sjúkdóminn og batann hefur vakið athygli. Fyrst var frábært viðtal við Guðlaugu Kjartansdóttur og í öðrum þætti brilleraði Arnar Eggert. Í þriðja þættinum var viðtal við Önnu Jónu Ármannsdóttur og mæltist henni vel að vanda. Hún hefur verið edrú í 30 ár. Svo heyrum við sögu Valgeirs Skagfjörð í fjórða þættinum. Mælum margfalt með þessum viðtölum á Rás 2.

 

 

 

 Nora Volkow í 60 MINUTES

Viðtal 60 mínútna við mestu áhrifamanneskju í fíkniheimum í dag, Íslandsvininn Noru Volkow, forstöðukonu NIDA, bandarísku fíknirannsóknarstofnunarinnar. Viðtalið er að hálfu um þekkingu á fíkn og að hálfu um afa Noru; félaga Trotskí. Og hér talar hún um hættulegastu fíkniefnin.

 

 

 Dagleiðin langa

Minnum á sýningar SÁÁ á Dagleiðinni löngu; frábært leikrit og aðgangseyririnn rennur til góðra mála. Enginn þarf að velkjast í vafa um hversu góð þessi sýning er; hún er frábær eins og hér kemur fram.