Lyfjameðferð við ópíóíðafíkn (LOF)

Gagnreynd lyfjameðferð við ópíóíðafíkn (LOF) hjá SÁÁ

LOF hjá SÁÁ

LOF er gagnreynd lyfjameðferð fyrir fólk með álvarlega ópíóíðafíkn (eins og sterk verkjalyf)

• Dregur úr dánartíðni
• Minnkar heilsutjón
• Styður við stöðugleika og bata

Flestir þeirra sem hefja LOF hjá SÁÁ hafa notað efnið í æð eða reykt þau og orðið fyrir alvarlegum afleiðingum vegna neyslunnar.

Lyfin sem notuð eru í meðferðinni eru:

• buprenorphine/naloxone töflur undir tungu daglega
• buprenorphine forðalyf sem gefið er undir húð mánaðarlega
• methadone mixtúra eða töflur sem gefið er daglega

Hvar meðferðin fer fram?

Upphaf meðferðar er oftast í innlögn á sjúkrahúsi SÁÁ, Vogi eða á göngudeild SÁÁ á Vogi, án innlagnar. Hún getur einnig hafist á Landspítala, fangelsi eða erlendis og er skjólstæðingum þá vísað til SÁÁ. Eftir þar fer meðferðin fram:

• á göngudeild SÁÁ á Vogi, oftast nær
• í apótekum (að uppfylltum skilyrðum)
• á heilsugæslum úti á landi (í samráði við LOF teymi SÁÁ)

Lyfjameðferð við ópíóíðafíkn er einnig veitt frá Geðdeild Landspítala og í fangelsum. Gott samstarf er á milli SÁÁ og þessara stofnana og fara skjólstæðingar á milli þjónustuaðila í samráði.

Hvernig fer meðferðin fram?

LOF er veitt af þverfaglegu teymi heilbrigðisstarfsfólks á heilbrigðisstofnun, samkvæmt skýrum og öryggis- og gæðaviðmiðum.

Í upphafi fer fram heildarmat og sjúkdómsgreining og meðferðarþörf metin.

Gerð er einstaklingsmiðuð meðferðaráætlun í samvinnu við skjólstæðing.

Eftirfylgd með meðferðinni er í höndum heilbrigðisstarfsfólks í LOF-teymi SÁÁ. 

Aðgengi skjólstæðinga að LOF-teymi SÁÁ er gott.

Brugðist er við frávikum, bakslagi í neyslu, veikindum eða öðru, með samtali og endurmati á meðferðaráætluninni.

Regluleg, skipulögð eftirfylgniviðtöl fara fram á LOF-göngudeild SÁÁ og önnur viðtöl fara fram eftir þörfum.

Fylgst er með:

• Lyfjatöku annarra lyfja og vímuefnaneyslu, m.a. með þvagprufum og niðurstöður ræddar með markmið skjólstæðings í huga
• Lyfjaávísunum í lyfjagagnagrunni Landlæknis. Almennt er ekki mælt með að taka önnur ávanabindandi lyf með lyfjameðferð við ópíóíðafíkn

Mikil þjónusta er veitt hjá SÁÁ samhliða LOF

Við upphaf LOF er einstaklingur oftast líka í annarri meðferð við fíknsjúkdómnum, ýmist hjá SÁÁ eða annars staðar.

Margir fara í 4 vikna meðferð á Vík, meðferðarstöð SÁÁ á Kjalarnesi og/eða nýta sér göngudeildarmeðferð hjá SÁÁ í upphafi.

Sálfélagsleg meðferð er alltaf til staðar og ráðlögð fyrir skjólstæðinga í LOF. Þeir geta fengið viðbótarþjónustu ef þörf þykir t.d. í inniliggjandi úrræði, dagmeðferð í göngudeild SÁÁ eða stuðningsviðtölum. Sumir byrja eingöngu með lyfjameðferð, en nýta sér síðar, frekari meðferð við fíknsjúkdómi.

Fyrir suma er LOF fyrst og fremst skaðaminnkandi meðferð, sem dregur úr hættu á ofskammti. Aðrir stefna á að ná bata frá allri vímuefnaneyslu og þá er LOF mjög góður stuðningur.

Stærsti hluti skjólstæðinga í LOF hjá SÁÁ í dag, hafa náð góðum árangri, meðferðarheldni er góð og stöðug, en meðferðin er oftast til margra ára.

Samningur um LOF

LOF hjá SÁÁ er veitt samkvæmt þjónustusamningi SÁÁ  við Heilbrigðisráðuneytið og Sjúkratryggingar Íslands.

Skjólstæðingar í LOF greiða komugjöld fyrir þjónustu í göngudeild LOF í samræmi við samning SÍ en þó að hámarki eitt komugjald í mánuði.