Fræðsla og miðlun um spilavanda í brennidepli

Leiðir til að auka þekkingu á spilavanda og gera upplýsingar aðgengilegar voru í brennidepli í nýlegri heimsókn á vegum SÁÁ til Center for Ludomani í Kaupmannahöfn. Áherslan var á fræðslu, forvarnir og miðlun og hvernig ná megi til fólks með spilavanda, aðstandenda og ungs fólks.

Heimsóknin var tækifæri til að kynnast fræðslustarfi miðstöðvarinnar og sækja hugmyndir fyrir áframhaldandi miðlun SÁÁ um málaflokkinn. Meðal umræðuefna voru leiðir til að draga úr skömm og fordómum og auðvelda fólki að finna upplýsingar um þann stuðning sem stendur til boða.

Um Center for Ludomani

Center for Ludomani er danskt meðferðar- og þekkingarsetur sem sérhæfir sig í spilavanda og hefur starfað á þessu sviði í áratugi. Þar er boðið upp á meðferð og ráðgjöf fyrir einstaklinga sem glíma við spilavanda og aðstandendur þeirra, auk þess sem miðstöðin sinnir fræðslu og forvarnarstarfi.

Center for Ludomani leggur jafnframt áherslu á að auka þekkingu og umræðu um spilavanda í samfélaginu, meðal annars með fræðslu til ungs fólks, miðlun á stafrænum vettvangi og samstarfi við ólíka aðila.

Fjölbreytt miðlun um spilavanda

Eitt af því sem SÁÁ hafði sérstakan áhuga á að kynna sér var hvernig Center for Ludomani miðlar fræðslu um spilavanda og nýtir fjölbreyttar leiðir til að ná til ólíkra hópa.

Hlaðvarp er meðal þeirra miðlunarleiða sem nýttar hafa verið til að opna umræðuna um spilavanda. Þar er fjallað um málefnið frá ólíkum sjónarhornum, meðal annars hvernig spilavandi þróast, hugsanir og hegðun tengda spilamennsku, áhrif vandans á aðstandendur og tengsl tölvuleikja og fjárhættuspila meðal ungs fólks.

Slík miðlun getur verið mikilvæg leið til að gera upplýsingar um spilavanda aðgengilegri, skapa umræðu og ná til fólks sem annars myndi mögulega ekki leita sér upplýsinga eða aðstoðar.

Fræðsla til ungs fólks mikilvægur hluti forvarna

Sérstök áhersla er einnig lögð á að ná til ungs fólks áður en spilamennska þróast yfir í alvarlegan vanda.

Center for Ludomani fer meðal annars inn í framhaldsskóla með fræðslu og vinnustofur um fjárhættuspil og spilavanda. Þar fá nemendur fræðslu um hvernig spilavandi getur þróast og hvaða þættir geta haft áhrif á spilamennsku. Nemendur taka jafnframt virkan þátt með umræðum, verkefnum og raunhæfum dæmum.

Persónuleg reynsla er mikilvægur hluti af nálguninni. Einstaklingar sem sjálfir hafa glímt við spilavanda taka þátt í fræðslunni og deila reynslu sinni með ungu fólki. Með því er leitast við að skapa opið og einlægt samtal um fjárhættuspil, afleiðingar þeirra og hvenær spilamennska getur verið farin að valda vanda.

Þessi nálgun vakti sérstakan áhuga í heimsókninni, enda mikilvægt að skoða áfram hvernig hægt er að efla forvarnir og fræðslu um spilavanda meðal ungs fólks á Íslandi.

Aðgengilegar upplýsingar og skýr næstu skref

Eitt af því sem rætt var í heimsókninni var mikilvægi þess að fræðsla hjálpi fólki bæði að þekkja einkenni spilavanda og átta sig á hvert það geti leitað. Það á við um einstaklinga sem hafa áhyggjur af eigin spilamennsku og aðstandendur sem leita upplýsinga og stuðnings.

Heimsóknin gaf hugmyndir að því hvernig nýta megi fjölbreyttar miðlunarleiðir í áframhaldandi fræðslustarfi SÁÁ um spilavanda. Þar má meðal annars líta til fræðslu sem byggir á samtali, virkri þátttöku og reynslu fólks sem sjálft hefur glímt við vandann.

Markmiðið er að auka þekkingu, stuðla að opinni umræðu og gera upplýsingar um aðstoð sýnilegri og aðgengilegri.